Escribiu Víctor Hugo sobre o polbo que o animal parece un paraugas pechado cando nada. E quizais pola nosa estreita relación cos paraugas, aos galegos únenos un vínculo cos polbos que transcende o gastronómico e chega ao emocional. Non hai casa na que non se servise, non hai celebración que non presidise. Os polbos son parte arraigada da nosa tradición, da nosa cultura e do noso ser. Por iso o polbo, como icona de toda unha comunidade, é o protagonista da exposición “Pulpezas”, do artista Mon Devane.

Os murais de Mon Devane xa forman parte da paisaxe urbana galega, como o fan hórreos, cruceiros ou pazos. Pero nesta mostra o artista ourensán vai un paso máis aló na súa creación, explorando novas técnicas e volumes, abordando con novos materiais o diálogo visual entre a natureza e o imaxinario cultural galego, sempre presente na súa obra.

A exposición inclúe oito pinturas e oito esculturas, como oito son os tentáculos do polbo (e tres os seus corazóns, que non hai animal con maiores e mellores corazonadas). Nas pinturas, o artista emprega trazos fluídos e cores suxestivas. As esculturas, pintadas a man, amosan ao animal expandíndose no espazo, coma se tratase de abrazarnos. En ambos os casos, pintura e escultura, deixa Devane a súa marca de muralista impregnando as texturas con palabras a modo de tags propios do graffiti.

O polbo como inspiración, marca e identidade. Non fan falta aceite, cachelos ou pemento, nin sequera fai falta pan para sentir que esta é unha exposición que merece ser degustada.

Lucía Taboada