Cando o Centro de Estudos Fotográficos (https://cefvigo.wordpress.com/) interrompe a súa actividade como editora, despois de ter publicado en trinta anos 44 libros de fotografía, xorde a idea de facer un “velorio” en forma de exposición da súa actividade editorial. As circunstancias non o fixeron posíbel, mais non se abandonou a idea que, co tempo, foi collendo máis intensidade, e xurdiu o proxecto Cabodano da actividade editorial do CEF.

Xa que nos cabodanos a dor do velorio vai deixando paso á memoria, pareceunos un bo título para este proxecto onde a memoria é o esencial. Mais tamén pode considerarse unha celebración de fin de ciclo, dado que hoxe as circunstancias son moi diferentes, a crise, os recortes, as tecnoloxías dixitais… fixeron cambiar o mundo da edición.

En vez de celebralo coa clásica exposición descritiva, xeralmente tan aburrida como carente de interese estético, convidamos, a tres artistas -Ana Soler, Fran Herbello e Joan Fontcuberta- a traballar sobre os libros que publicamos, seguindo a liña do CEF de darlle máis importancia á produción de proxectos que á recepción de proxectos xa realizados. Traballos que foron mostrados en 2019 Na sala da Fundación de Vigo.

Posteriormente en 2021, iníciase unha nova etapa do proxecto, Cabodano. IIª Andaina, pondo a disposición de diferentes artistas os libros que quedan, que son fundamentalmente exemplares de Do Trinque. Colección de 22 libros dos que a metade están dedicados a artistas galegos daquela emerxentes. Algúns deses traballos, como os de Victoria Diehl ou Fran Herbello, tiveron unha importante proxección fóra de Galiza. Os restantes son de fotógrafos e fotógrafas de gran relevancia internacional, como Karen Knorr, Antoine D’Agata, Joachim Schmid, Luis González Palma, Aziz+Cucher…

Coa obra de Rosendo Cid dase continuidade a este proxecto, do que xa se teñen presentado as propostas de Almudena Fernández, Alberto Ardid, Mónica Alonso, María X. Fernández, Juan Rivas, Ignacio Pérez Jofre, Din Matamoro e Christian Villamide. No futuro irán dándose a coñecer outras propostas.

Manuel Sendó