IX CATA A ARTE
Ciclo / Cata a arte 02 ó 30 de novembro
Consolídanse un ano máis estas presentacións e degustacións de catro adegas da Denominación de Orixe máis antiga de Galicia acompañadas de accións culturais paralelas como poesía, maxia ou música.
As catas comezarán o xoves da semana que vén e o seu aforo estará limitado a 100 persoas por xornada, e as prazas serán cubertas por orde de retirada das entradas de forma presencial no Centro Cultural desde o luns anterior a cada evento, cun máximo de dúas entradas por persoa.
A primeira xornada, do día 2 de novembro, celebrarase unha cata guiada dos viños institucionais, branco e tinto, do C.R.D.Ou. Ribeiro, denominados como “Fillas D.O. Ribeiro” da man dun recoñecido catador.
O pistoletazo de saída en canto ás adegas poñerao Adega Pousadoiro o 9 de novembro cunha degustación dos seus viños, acompañada dun recital poético do autor Carlos Abeledo.
O xoves 16 de novembro continuaremos coa cata de Adegas Loeda que presentará o seu viño branco treixadura Catro Parroquias acompañado dunha actuación de maxia co Mago Deimi.
O 23 de novembro, Benito Eladio Rodríguez e amigos deleitarannos cun recital de cancións e de poemas, ben acompañados dunha degustación do viño branco Torques e do tinto Tarabelo, da adega Arco dá Vella Adega de Eladio.
E para finalizar esta novena edición, Adega Alanís poñerá o broche final o xoves 30 de novembro, onde fará unha degustación do seu viño Gran Alanís 2022 en harmonía dunha actuación musical.
As catas novamente terán un carácter solidario. O C.R.D.O. Ribeiro, co Centro Cultural Marcos Valcárcel e a Deputación de Ourense, colaboran un ano máis conxuntamente en apoio á Asociación para a Loita contra as Enfermidades Renais (ALCER Ourense), polo que, nesta novena edición, solicitarase aos asistentes un donativo a favor desta organización de carácter social e sen ánimo de lucro que ten como finalidade mellorar a calidade de vida de todas aquelas persoas afectadas por enfermidades renais e os seus familiares; desenvolvendo distintas actividades enfocadas á prevención e a loita contra as enfermidades que afectan o ril, así como á doazón de órganos; tamén ofrecen servizos de interese como son os de traballo social, nutrición ou psicoloxía. A asociación está composta por persoas con enfermidade renal crónica en tratamento de diálise, con transplante de ril, familiares, así como persoas sensibilizadas con este tipo de enfermidades e a súa problemática.